Managsuon gibugha tungod sa yuta

http://www.sunstar.com.ph/superbalita/08-19-2007/balita3.html
KAPULISAN sa lungsod sa San Fernando, Sugbo nisentro na karon sa ilang imbestigasyon labot sa kasungian sa yuta.

May labot kini sa pagpusil patay sa duha ka mga managsuon ug pagkaangol sa ilang inahan ug katabang.

Kahinumdoman niadtong Biyernes sa buntag ang managsuong Crispin ug Emmanuel Llanto gipusil sa duha ka wa mailhing mga tawo nga nagsakay og motorsiklo.

Ang duha namatay diha-diha human mangaigo ang ilang ulo samtang ang ilang inahan nga si Evangeline ug katabang nga si Lolita nasamdan ug anaa karon sa tambalanan.

Basi sa imbestigasyon ang mga biktima gikan nitambong og hearing sa kaso may kalabotan sa yuta apan sa pagpamauli gipusil sa duha ka mga tawo sakay sa motorsiklo. Mga mamumuno nagtaptap sa ilang mga nawong.

Nakuha gikan sa crime scene ang napulo ka mga kabhang sa bala, lima sa 9MM pistol ug lima sa .45 caliber pistol.

Si Chief Insp. Atonieto Cuyos, hepe sa San Fernando police station, nga nahinabi sa Sun.Star Superbalita niingon nga wa pa silay suspek sa hitabo.

Apan iyang gitataw nga usa ra ka anggulo ang ilang gisunod nga maoy posibleng motibo sa kremin ug kini may kalabotan sa kasungian sa yuta. “Wala man tay laing gitan-aw ka dili man ni sila mga pulitiko, so, walay pulitika ani dili pod ni sa business,” asoy ni Cuyos. (DRT)